COMERCIO E INDUSTRIA
O Concello reafirma o seu compromiso co pequeno comercio mediante a firma do convenio con Zona Aberta O Salón Nobre do Consistorio acolleu este mediodía a sinatura do convenio anual de colaboración entre o Concello de Vilagarcía e a asociación de comerciantes Zona Aberta. A través deste acordo, o executivo socialista reafirma o seu compromiso co pequeno e mediano comercio da vila. A colaboración municipal plásmase nunha axuda de 15.000 euros destinada á contribuír ao desenvolvemento do sector comercial da cidade mediante o mantemento e promoción do comercio retallista.
18.08.2021.- O alcalde, Alberto Varela, e a presidenta de Zona Aberta, Rocío Louzán, foron os encargados de firmar o convenio no acto no que tamén participou a concelleira de Promoción Económica, Alba Briones.
A subvención de carácter nominativo debe destinarse ao financiamento dos gastos de actividades e campañas de promoción e fomento do comercio local realizadas pola asociación ao longo do presente ano e que deben de recollerse nunha memoria final xustificativa. A feira de oportunidades Expoferta, a campaña de Volta ao Cole ou as dos días do Pai e da Nai son algunhas das iniciativas que neste sentido leva a cabo Zona Aberta.
O convenio anual con Zona Aberta non é máis que unha das moitas liñas de colaboración que o Concello mantén coa asociación de comerciantes de Vilagarcía, unha cooperación que vén de moito atrás pero que se ten intensificado de xeito importante no último ano e medio co obxectivo de axudar ao sector a paliar as perdas de ingresos orixinadas polos peches e o descenso da actividade durante a pandemia. Iniciativas directas como os bonos compra “Son da Casa”,
subvencionados polo Concello e que xa suman tres edicións, ou outras indirectas como a dinamización de rúas que atrae xente á cidade e anima á mercar e consumir no noso comercio e na nosa hostalaría (xardíns efímeros e mercado de Nadal, concursos de escaparates, o “EspaVila” actividades festivas…) son só algunhas mostras das propostas que o Concello puxo en marcha para revitalizar a actividade comercial e tamén a hostaleira do municipio.
Estas liñas de colaboración son froito tamén do contacto permanente que a responsable de Promoción Económica mantén co sector para poñer en común as estratexias a desenvolver e as accións a través das cales materializalas, como xa se recolle no Plan de Promoción e recuperación Económica “Vilagarcía 20/21 deseñado polo Concello e dotado con máis de 1 millóns de euros.