CULTURA
A Sociedad Filarmónica regresa con dous concertos do trío composto por Diana Tishchenko, Claudio Bohorquez e Itamar Golan A música de cámara regresa ao Auditorio Municipal esta fin de semana cos Concertos de Primavera da Sociedad Filarmónica de Vilagarcía. A volta á actividade tras a suspensión da programación como consecuencia da crise sanitaria celebrarase coa actuación dun tío con piano integrado por tres grandes intérpretes internacionais: a violinista Diana Tishchenko, o cellista Claudio Bohorquez e o pianista Itamar Golan; que interpretarán un programa principalmente romántico.
22.04.2021.- Debido ás restricións de aforo, a Filarmónica organiza dous concertos, un o venres e outro o sábado, para garantir que todos os seus asociados poden asistir a este gran espectáculo musical. Comezará ás 21:00 horas. O programa para estes dous concertos inclúe obras tan emblemáticas como a Vocalise e o Primeiro Trío Elegiaco do compositor ruso S. Rachmaninov e o virtuoso trío en re menor de Mendelssohn.
Intérpretes de prestixio internacional
A violinista ucraniana Diana Tishchenko é a gañadora do Gran Prix na lendaria Thibaud Competition de Paris e actualmente Xoven Estrela na Residencia da Asociación de Auditorios de Europa, ademais de ter un contrato en exclusiva de gravación co selo discográfico Warner.
Pola súa banda, o alemán de orixes latinoamericanos, Claudio Bohorquez foi cello solista en orquestras tan afamadas como as sinfónicas de Chicago, Cleveland, Los Ángeles, Viena ou Gewandhaus, ademais de ser un excepcional músico de cámara e profesor en Berlín . Por último, o israelí Itamar Golan é un dos máis reputados pianistas de cámara do mundo, actuou con gran parte dos máis prestixiosos músicos mundiais como Vengerov, Maisky ou Janine Jansen e como solista en orquestras como as filarmónicas de Israel, Berlin ou Viena.
Dúo de violín e piano para o mes de maio
Os concertos de primavera da Sociedad Filarmónica de Vilagarcía continuarán en maio coa actuación do dúo composto violinista Guy Braunstein e o pianista Inon Barnatan. Como nesta ocasións, ofrecerán dous concertos na mesma fin de semana, o venres 28 e o sábado 29 de maio, para garantir a asistencia do maior número de público,
Os interesados en obter máis información sobre os concertos as actividades que desenvolve a Sociedade Filarmónica de Vilagarcía, poden visitar a web http://www.sfvilagarcia.com