SANIDADE
O Concello volve a colaborar co Sergas cedendo Fexdega para axilizar a vacinación da Covid O Concello de Vilagarcía de Arousa volve a colaborar co Sergas para o desenvolvemento das labores de vacinación contra a Covid co obxectivo de axilizar o proceso e facer que chegue canto antes ao maior volume de poboación. Como xa aconteceu hai unhas semanas, o Concello volve a poñer a disposición da Consellería de Sanidade o pavillón de Fexdega, que se utilizará como punto de vacinación do martes ao sábado desta semana. Unhas 2.500 persoas serán citadas a vacinarse en Fexdega nesta nova quenda.
O dispositivo que habilitará o Sergas en Fexdega ponse en marcha mañá martes pola tarde e pecharase o sábado a mediodía. Dous equipos de vacinación traballarán de forma simultánea en quendas de mañá e tarde o mércores, xoves e venres, e nas medias xornadas do martes e sábado. Calcúlase que en cada xornada completa de vacinación pasen por Fexdega unas 600 persoas a recibir o pinchazo.
Ademais de poñer a disposición as instalacións de Fexdega para desconxestionar os puntos habituais de vacinación e facilitar a atención a maior volume de persoas en espazos máis amplos que permitan manter as correctas distancias, o Concello tamén colabora proporcionando recursos humanos, xa que será persoal do Servizo Municipal de Emerxencias quen se encargue de sinalizar os corredores de acceso e saída, e controlar o acceso ás instalacións segundo os horarios das citas previamente concertadas polo Sergas.