MEDIO AMBIENTE
Xardíns protexe os plátanos de Ravella coa instalación de tensores O servizo municipal de Xardíns está procedendo a instalación de tensores nos antigos plátanos do parque de Ravella, unha medida preventiva que ten como obxecto aliviar a carga das pesadas ramas e evitar o seu tronzamento. A actuación foi recomendada polos técnicos da Estación Fitopatolóxica do Areeiro e afectará todos os exemplares do paseo central desta emblemática zona verde de Vilagarcía.
10.03.2021.- Os vellos plátanos de Ravella son obxecto de seguimento continuo por parte do servizo municipal de xardíns. Trátase dunhas árbores que rondan a centena de anos e cuxa característica imaxe das ramas entrelazadas entre exemplares de ambas beiras do paseo, identifica este xardín de Vilagarcía.
Os plátanos foron obxecto de diferentes tratamentos ao longo das últimas décadas co obxecto de paliar enfermidades e inicios de podremia, afeccións causantes de ocos visibles en algunhas ramas e partes dos troncos. Cos tratamentos estanse controlando estas afeccións para alargar a vida das vellas e características árbores de Ravella, garantindo á vez, a súa seguridade. Neste marco encadra a última medida adoptada, a instalación dos tensores para aliviar a carga causada pola horizontalidade na que se espallan as grosas ramas como consecuencia dos enxertos para entrelazalas. As cinchas quedarán instaladas de forma permanente.