VILAGARCIA DE AROUSA

PATRIMONIO
A Deputación confirma a subvención para os traballos de mantemento do edificio histórico do Concello
A Deputación Provincial de Pontevedra conformou ao Concello de Vilagarcía a concesión da subvención solicitada para financiar traballos de mantemento do edificio histórico do Concello. A contía concedida ao abeiro da liña de axudas provinciais para a rehabilitación e sinalización do patrimonio histórico-cultural dos concellos da provincia ascende a 18.000 euros, aos que a administración local engadirá os 20.365 que restan para completar o orzamento da actuación. Os traballos afectarán tanto ao interior como ao exterior do edificio e consistirán en arranxos e pequenas obras de acondicionamento estético de fachadas, paredes, solos, teitos, portas e calefactores.

04.05.2021.- O edificio orixinal do consistorio vilagarcián é un proxecto do arquitecto Domingo Sesmeros construído en 1889. Ao longo dos anos sufriu varias modificacións e ampliacións, a parte nobre mantén a súa estrutura e estética inicial. O edificio está incluído no catálogo municipal de bens e conta cunha protección de grao elemental, que permite realizar obras de acondicionamento e reestruturación interiores, respectando o exterior.

A parte do edificio municipal no que se centran as obras alberga na planta baixa as dependencias de portería e varios despachos, así como a entrada principal, que da acceso á planta superior a través das vistosa escaleira imperial de canteira con balaustrada e pasamáns de madeira labrada. O primeiro andar acolle o salón nobre, a sala de xuntas de goberno, o despacho do Alcalde e demais dependencias da Alcaldía e outros tres despachos. O estado actual do edificio é bo, polo que os traballos previstos limitaranse a labores de mantemento e conservación que afectan basicamente ao aspecto, acabados e condicións de habitabilidade e confort das instalacións.

A actuación prevé o saneamento e pintado do exterior do inmoble, e tamén de todos os paramentos verticais do interior (paredes, zócalos e rodapés). Tamén se acondicionarán e pintarán os teitos e se repararán as antigas portas de madeira con labores de lixado, recuperación de volumes, aplicación de tratamentos e pintado ou vernizado final. Todo o edificio conta con pisos de madeira que se repararán -substituíndo os listóns deteriorados-, pulirán e volverán a vernizar. Por último, tamén se desmontarán os vellos radiadores de fundición para repintalos e volver a colocar.