VILAGARCIA DE AROUSA

CONCELLO
O prendido das luces farase vía streaming coa presenza de Papa Noél, que interactuará cos nenos a través de Facebook e Youtube
Como consecuencia da actual crise sanitaria, o popular e xa tradicional prendido das luces de Nadal, previsto para o vindeiro venres, 27 de novembro, terá que facerse este ano dun xeito distinto, pero non por iso menos emotivo e ilusionante. Para evitar aglomeracións na praza de Galicia, Papa Noel chegará un pouco antes á cidade e, vía streaming, interactuará cos nenos e nenas que entren na páxina de Fabebook e no canal de Youtube do Concello. Axudado por un peculiar elfo, Papa Noel explicará como encara o Nadal e responderá ás cuestións que lle farán chegar os vilagarciáns.

23.11.2020. Despois de ver como chega á cidade procedente de Rovaniemi e logo de resolver, durante un bo rato, as que seguro que serán moitas dúbidas dos vilagarciáns tendo en conta as restricións de mobilidade, Papa Noel, na compaña do alcalde, procederá a pulsar o botón máxico que fará que todas as luces do Nadal prendan á vez. Isto quere dicir que xunto co cono da praza de Galicia, con 20 metros de altura, tamén o farán os 13 xardíns efémeros con decoración típica do Nadal que decorarán outras tantas rúas e prazas do municipio.
Dende o Concello anímase á xente a participar nesta singular forma de comezar o período festivo, evitando na medida do posible aglomeracións na rúas e, en calquera caso, mantendo a distancias de seguridade e usando máscaras. O goberno de Alberto Varela é plenamente consciente de que malia que as cifras do Covid van mellorando, aínda queda moito por camiño por andar e as festas serán este ano irremediablemente distintas, o cal non quere dicir que se teña que renunciar a vivilas nin ao ambiente que se xera arredor delas.
Se o prendido das luces será o venres, ao día seguinte porase en marcha a segunda fase da campaña de animación do comercio e hostalería “Son da Casa”, o que fará poñer en circulación 112.500 euros. Unha semana despois, botará a andar o mercado de Nadal, nesta ocasión distribuído en máis superficie para axudar a manter as distancias sen renunciar ao ambiente de celebración.