VILAGARCIA DE AROUSA

ECONOMÍA
Vilagarcía manterá o Mercado de Nadal para seguir contribuíndo á recuperación da economía local tras o covid
Concellería de Promoción Económica do Concello de Vilagarcía decidiu celebrar tamén este ano o Mercado de Nadal. A iniciativa que naceu ao ano pasado coa intención de engadir contidos á oferta festiva, complementar a ambientación de rúa e dinamizar a actividade comercial e hostaleira da cidade durante estas festas, adquire nesta ocasión mais relevancia si cabe, dada a necesidade que ten o sector comercial de repoñerse das consecuencias dos peches durante o estado de alarma. Ademais, en vista de que as restricións sanitarias impostas para previr o covid apuntan a que o deste ano será un Nadal atípico, na decisión de celebrar o Mercado de Nadal incidiu tamén a necesidade de que as festas manteñan o brillo e a alegría que as caracteriza con actividades que, como esta, resultan axeitadas ás circunstancias, por discorrer ao aire libre e nas que se pode controlar e garantir o cumprimento das normas de seguridade.

03.10.2020.- Como o ano pasado, o Mercado de Nadal situarase na Praza da Independenza, podendo repartirse pola súa contorna para unha maior distribución e separación de postos e visitantes. O Concello disporá as 16 casiñas de madeira adquiridas na pasada edición para poñer a disposición dos comerciantes que se sumen á proposta. Por decontado, a actividade debe centrarse na temática de Nadal polo que os produtos a exhibir e vender deben gardar relación con esta celebración: gastronomía tradicional de Nadal, plantas e árbores de Nadal, artigos de decoración típica destas datas, agasallos, artesanía, xoiería, bixutería, xoguetes e demais…

Os destinatarios principais do Mercado de Nadal son os comerciantes e artesáns locais, que terán prioridade á hora de adxudicarse os postos, aos que poderán optar por períodos semanais, pudendo reservar unha semana, dúas ou as tres que está previsto que dure o mercadiño. O Concello reserva este ano unha caseta para as ONGs, Fundacións e outras entidades de carácter social e sen ánimo de lucro radicadas no termo municipal que irán rotando durante uns días para poden exhibir e poñer á venta os traballos que realizan nos seus obradoiros.

A diferenza da pasada edición, o Concello xestionará directamente tanto a organización como o funcionamento do Mercado de Nadal deste ano. A Concellería de Promoción Económica está ultimando as bases que regularán a convocatoria que, tan pronto sexan aprobadas pola Xunta de Goberno se farán públicas para que os interesados coñezan os requisitos de participación. Será a partir dese momento cando se abra o prazo de inscrición. Maila isto, os interesados en participar ou en recibir información poden facelo previamente a través do correo electrónico tle@vilagarcia.gal