MULLER
Concello e XTodas renovan a súa colaboración para asesorar e acompañar a vítimas de violencia de xénero O Concello e a asociación XTodas acaban de renovar o convenio que lles permitirá continuar colaborando, por terceiro ano consecutivo, en materia de erradicación da violencia machista e de apoio ás mulleres vítimas desta lacra. O alcalde, Alberto Varela, e a presidenta do colectivo, Eylin Colmenares, asinaron este mediodía en Ravella o documento mediante o que o Concello aporta a XTodas 1.500 euros e amplía un ano máis a cesión do local da Escola Unitaria de Bamio a cambio de que persoal formado do colectivo complemente as labores de asesoramento e acompañamento a mulleres vítimas de violencia de xénero en situacións ás que non chegan os servizos municipais a través do CIM.
18.08.2020.- Segundo se establece no convenio, a asociación XTodas comprométese a colaborar coa Concellería de Igualdade no marco deste convenio e dotar ás súas voluntarias da formación necesaria para o apoio e acompañamento ás mulleres vítimas de violencia machista, especialmente ás usuarias do Centro de Información á Muller (CIM) do Concello de Vilagarcía, garantindo, en todo caso, a confidencialidade das beneficiarias. Así mesmo, o colectivo debe derivar a todas as beneficiarias dos acompañamentos que realice ao CIM, como centro coordinador e responsable de ofrecer e garantir información e asesoramento social, xurídico e psicolóxico ás mulleres vítimas da violencia machista. En consecuencia, a asociación debe comunicar periodicamente ao CIM a relación de mulleres atendidas.
Dado que o Concello cede en precario á entidade o local da Unitaria de Bamio, XTodas comprométese a manter en bo estado as instalacións. Por último, o colectivo deberá reflectir en toda a súa publicidade a colaboración do Concello. O colectivo XTodas leva tres anos colaborando co Concello nas labores de asesoramento e acompañamento a vítimas de violencia machista nas situacións ás que a administración non chega por limitación de persoal ou horarios de atención ao público. No último ano comprendido entre mediados de 2019 e mediados de 2020, a asociación leva atendido en torno a 25 mulleres vítimas de violencia machista, ademais de ter organizado obradoiros e actividades formativas sobre a materia.