CONCELLO
A Xunta Local de Seguridade reúnese o mércores para coordinar o control das normas COVID durante as celebracións de agosto O Concello de Vilagarcía acolle o mércores, 5 de agosto, a reunión da Xunta Local de Seguridade. O órgano que soe reunirse anualmente nestas datas para coordinar os operativos de seguridade cidadá relacionados cos actos multitudinarios das festas San Roque, amplía este ano o seu ámbito de actuación para centrarase tamén no control do cumprimento da normativa COVID nas celebracións e nas zonas de ocio nocturno.
31.07.2020.- A subdelegada do Goberno na provincia, Maica Larriba, presidirá co alcalde, Alberto Varela, a reunión que ten como obxectivo e principal punto da orde do día “Reforzar a presenza policial nas celebracións festivas que terán lugar no mes de agosto co fin de garantir o cumprimento das normas establecidas en materia de saúde pública e prevención do contaxio do COVID”. O reforzo aos efectivos da Policía Local realizarase con axentes da Policía Nacional e Garda Civil. Dadas as circunstancias que se están a vivir cos rebrotes do COVID, o Concello tamén solicitou a intervención da Policía Autonómica en base ao establecido na propia normativa autonómica na que se fixan os protocolos a seguir nas actividades de ocio nocturno, festas, verbenas e outros eventos populares e atraccións de feiras,
O segundo e último punto da orde do día da Xunta Local de Seguridade refírese precisamente ao establecemento do protocolo de colaboración, coordinación e cooperación en materia de seguridade cidadá entre os corpos e forzas de Seguridade do Estado e a Policía Local.
En tanto non se celebra esta Xunta, o Concello de Vilagarcía intensificará esta fin de semana as inspeccións e controis dos locais de ocio nocturno para garantir que se cumpran todos os requirimentos de seguridade e prevención do COVID, tanto no que ás medidas hixiénico sanitarias se refire (uso de máscaras, distancias, xel..) como de horarios. Ademais, dada a evolución que está a seguir a pandemia e aos excesos que se detectan nalgúns lugares, xa se comunicou aos hostaleIRos do sector do ocio nocturno que nas denuncias polos iNcumprimentos detectados proporanse as sancións máximas previstas na lei.