EMPREGO
Once proxectos compiten para lograr un dos tres premios ás mellores iniciativas emprendedoras A falla dun día para que conclúa o prazo establecido nas bases, nestes momentos hai xa rexistrados once proxectos que optan a un dos tres premios establecidos no Concurso de Iniciativas Emprendedoras que organiza a Concellería de Promoción Económica, dirixida por Alba Briones. Tendo en conta a posibilidade de inscribirse por vía telemática é posible que aínda cheguen novas propostas. Os participantes optan a recoñecementos que levan aparellados 8.000, 5.000 e 3.000, o que non deixa de ser un estímulo para o arranque dun negocio.
28.02.2020. De acordo coas bases –que se poden consultar integramente na web http://www.vilagarcia.gal - as ideas e proxectos que se formulen deberán contribuír ao desenvolvemento social e económico do Concello de Vilagarcía de Arousa e a súa área de influencia. Ademais disto, valorarase a viabilidade económica, comercial e técnica da iniciativa; o potencial de creación de emprego; a modernización dos sectores tradicionais da zona; o efecto tractor, definido como capacidade de ofertar servizos a outras empresas para que o aumento da súa competitividade; e as actividades que dean resposta a retos medioambientais e ao cambio climático.
De entre todos os proxectos presentados, o xurado seleccionará seis e estes serán os que reciban unha formación e mentorización específica de 14 horas. Unha vez conclusa esa fase, os promotores terán que defender a súa idea publicamente e será entón cando se dean a coñecer as iniciativas gañadoras.