CONCELLO
O goberno aproba a anulación dos recibos dos vados afectados polas obras en Vázquez Leis Tan só uns días despois de que o alcalde de Vilagarcía, Alberto Varela, prometera aos veciños de Vázquez Leis que se lles eximirá do pago da taxa dos vados emprazados na rúa, o goberno local dou cumprimento á medida. A Xunta de Goberno Local celebrada a semana pasada aprobou a proposta de anulación dos recibos de 2020 ás 7 reservas existentes. A medida trata de compensar as dificultades que están a padecer os usuarios para facer uso deste servizo debido á demora que acarrexan as obras de humanización, paralizadas pola quebra da adxudicataria, Nexia, e mentres non se atopa unha solución a esta complexa situación na que tamén se atopan outros municipios da zona.
24.02.2020.- O goberno local segue tratando de atopar a fórmulas máis axeitada para salvar un problema sobrevido e totalmente alleo á responsabilidade municipal. Os técnicos avalían as alegacións interpostas por Nexia para evitar que a rescisión do contrato decretada polo Concello poida acabar nos tribunais, o que dilataría máis a súa solución; e dende o goberno búscase a vía da negociación coa empresa que adquiriu á construtora en quebra para poder rematar a obra coa maior brevidade posible.