EMPREGO
O Labora Xove 20 amplía en contidos e duración a proposta formativa para os módulos de Socorrismo e Mantemento de xardíns A Área de Emprego da Concellería de Promoción Económica do Concello de Vilagarcía ten a intención de potenciar o obradoiro Labora Xove, destinado a mozos e mozas desempregados, co obxectivo de implementar a formación que se ofrece a través desta acción e elevar as posibilidades de empregabilidade dos participantes. Para isto, o novo proxecto elaborado pola área que dirixe Alba Briones para desenvolver este ano plantea un obradoiro de 12 meses de duración (o dobre que a edición de 2019) así como dar máis contidos aos dous módulos propostos: o de Socorrismo Acuático e o de Instalación e Mantemento de xardíns e zonas verdes.
20.02.2020.- As especialidades recollidas no proxecto presentan unha elevada demanda no mercado laboral, especialmente a de socorrismo acuático, razón pola que o Concello continúa apostando por ela e ampliando os contidos da formación. De feito este a no, engádese a formación relativa a goberno de embarcacións de salvamento. No módulo de instalación e mantemento de xardíns e zonas verdes, a formación deste ano inclúe tamén a formación en aproveitamentos forestais.
O Concello xa presentou o proxecto á convocatoria realizada pola Consellería de Economía, Emprego, a través da que solicita unha subvención de 369.491 euros, aos que o Concello sumaría 25.000 máis de fondos propios, para completar o custe do obradoiro mediante o cal que se formarían 16 mozos e mozas (8 por módulo).
Segundo recollen as bases que rexen este tipo de iniciativas de fomento do emprego, o obradoiro terá unha única etapa de formación en alternancia co traballo ou a práctica profesional, e a súa finalidade será a obtención por parte dos alumnos dos correspondentes certificados de profesionalidade. Durante esta etapa os alumnos e alumnas percibirán as retribucións salariais que lle correspondan de conformidade co previsto na normativa aplicable e nesta orde. Na fase de aprendizaxe, o alumnado de ámbalas dúas especialidades realizará traballos ou servizos de interese social ou comunitario para o Concello. No caso da especialidade de Socorrismo, realizarán asistencia operativa ao Servizos Municipal de Emerxencias e á Fundación Municipal de Deportes nas actividades de socorrismo nos espazos naturais e nas instalacións acuáticas de titularidade municipal con utilización de embarcacións específicas para o salvamento.
O alumnado da especialidade de Instalación e mantemento de xardíns e zonas verdes e aproveitamento forestal realizará tarefas de conservación e mantemento de xardíns e espazos públicos naturais con aproveitamento forestal zonas forestais municipais
O obradoiro Labora Xove está dirixido a mozos e mozas de dezaoito ou máis anos inscritos e en situación de beneficiarios no ficheiro do Sistema Nacional de Garantía Xuvenil no ámbito da Comunidade Autónoma de Galicia.