CONCELLO
O Plan Revitaliza informa na Praza de Galicia sobre a compostaxe individual e comunitaria Seguir fomentando a práctica da compostaxe como boa práctica para unha xestión dos residuos urbanos máis respectuosa co medio ambiente é o obxectivo principal da campaña que a Deputación de Pontevedra trae o martes 18 a Vilagarcía no marco do programa Revitaliza, no que colabora o Concello a través da Concellería de Medio Ambiente. A Praza de Galicia será o punto no que se instalará a carpa informativa coa que se tratará de que máis persoas se sumen á compostaxe, tanto na modalidade individual como comunitaria.
17.02.2020.- Dúas mestras composteiras serán as encargadas de informar ás persoas que pasen pola carpa entre as 10 a as 13 horas sobre os beneficios medioambientais da compostaxe, procedemento natural consistente na utilización dos residuos orgánicos que se xeran nas casas para a súa conversión no abono natural denominado compost. O proceso, baseado na descomposición e fermentación dos restos, é totalmente inocuo e moi sinxelo.
O Concello de Vilagarcía leva anos promovendo a compostaxe individual a través de diversas campañas de reparto gratuíto de composteiros para utilizar en vivendas unifamiliares ou que teñan pequenas hortas. E dende fai uns anos e a través do Plan Revitaliza da Deputación, tamén poden compostar os veciños de zonas urbanas, en concreto no barrio do Piñeiriño, a través dos dous puntos de compostaxe comunitarios instalados na zona. Boa parte dos colexios do municipio tamén practican a compostaxe.