CONCELLO
O Concello volve a solicitar á Xunta a contratación de 12 socorristas para atender as praias durante o verán O Concello de Vilagarcía está planificando a vindeira tempada de praia coa antelación necesaria para que todos os servizos estean a punto e en marcha a principios do verán. Por esa razón, a Xunta de Goberno Local acordou na reunión celebrada onte solicitar á Xunta de Galicia a contratación de 12 socorristas, ao abeiro do Programa de Fomento do Emprego e Mellora da empregabilidade no ámbito de colaboración coas entidades locais 2020.
11.02.2020.- O número de contratos solicitados é similar aos dos últimos anos, nos que a Xunta sempre acabou concedendo menos persoal e con contratos de menor duración, polo que o Concello tivo que asumir os custes correspondentes para garantir a cobertura do servizo de vixilancia e socorrismo nos tres areais do municipio: os dous de bandeira azul (O Campanario e Preguntoiro), onde é obrigatorio, e o da Concha-Compostela, o máis extenso e concorrido do municipio.
Segundo a proposta remitida á Consellería de Economía, Emprego e Industria, a intención do goberno é contratar aos 12 socorristas a xornada completa e polo período de 3 meses, o máximo que permite a orde que regula as subvencións. Para isto solicítase unha subvención de 54.000 euros aos que o Concello deberá achegar 4.133 euros máis.
O Concello deberá esperar a que a Consellería resolva a convocatoria para coñecer cántos contratos se financian este ano. En 2018 tamén se solicitaran 12 socorristas e a Xunta só concedeu 10, cifra que aínda rebaixaron máis en 2019, cando se concederon 8 contratacións e só por 2 meses, en lugar de polos 3 solicitados. Esta situación provocou que o Concello tivese que ampliar a súa achega ao plan, asumindo o custe de ampliación da duración deses 8 contratos ata os 3 meses e, a maiores, contratar directamente a outros 4 socorristas, a xornada completa por 3 meses, para completar o plantel necesario para dar cobertura as praias locais.
Unha vez se coñeza a resolución da Xunta, o Concello remitirá a oferta ao Servizo Público de Emprego para que seleccione aos candidatos a realizar as probas de selección entre os candidatos anotados como demandantes de emprego nas listas oficiais e que cumpran o requisito de contar con título homologado de socorrista acuático.