VILAGARCIA DE AROUSA

CONCELLO
Comeza a campaña especial de eliminación de verdín e limpeza de bancos
A Concellería de Medio Ambiente, a través do servizo de Xardíns e en colaboración con Cespa, comezou estes días a campaña especial para combater e eliminar o verdín que medra nas superficies húmidas e sombrías de beirarrúas e zonas peonís do municipio. Ademais de mellorar o aspecto dos solos ennegrecidos pola humidade, os traballos tamén inciden na seguridade dos peóns, posto que eliminan o risco de esvarar nelas como consecuencia do verdín. A campaña compleméntase coas labores de limpeza dos bancos de pedra de parques e zonas peonís.

07.02.2020.- Tras a intensas chuvias do outono e do que vai de inverno, o departamento que dirixe Diego García vén de poñer en marcha os traballos de posta a punto de rúas e mobiliario urbano para eliminar deles as consecuencias de tanta humidade: ennegrecemento pola aparición de piolla, crecemento de verdín e musgo. Para eliminalos, e como xa se ven facendo dende hai uns anos, nas tarefas de limpeza utilizarase un produto ecolóxico que, ademais de eliminar o verdín e a piolla, retrasa a súa aparición.

No que ás beirarrúas e chans de zonas peonís se refire, o traballo o levará a cabo o persoal da concesionaria de limpeza de vías, Cespa, utilizando as súas máquinas fregadoras á cuxa auga se incorpora o produto específico de limpeza de verdín. Neste caso, as labores realizaranse pola noite e comezarán polas rúas Rey Daviña, Castor Sánchez e A Baldosa, para continuar posteriormente por outras vías do municipio.

Os operarios de Xardíns encargaranse da limpeza dos bancos de pedra e doutros elementos dos parques públicos. Hai uns días acometeron a limpeza das escaleiras dos Xardíns Doutor Fleming, que tiñan acumulado bastante verdín debido á zona sombría na que se atopan é ás copiosas choivas, e tamén se limparon os bancos dese parque, así como dos de Ravella e a zona peonil da súa contorna. Para a limpeza dos bancos estase a utilizar máquinas cartcher con auga a presión.