VILAGARCIA DE AROUSA

OBRAS E SERVIZOS
Os reinvestimentos do Plan Concellos permitirán ampliar o saneamento en Vilaboa e mellorar a accesibilidade no Vento
O Concello de Vilagarcía acometerá dúas obras máis a través dos fondos da Deputación grazas ao reinvestimento das baixas producidas nas adxudicacións doutros proxectos. As actuacións que se van a levar a cabo mediante este sistema de financiamento son a Mellora e ampliación da rede de saneamento na Rúa Vilaboa e a Mellora da mobilidade e accesibilidade en O Vento-Cea.

01.09.2019.- A obra a levar a cabo en Vilaboa complementará a actuación realizada este mesmo ano polo Concello para paliar os problemas que sufrían os veciños desta rúa debido a atascos da rede e que consistiu en duplicar un tramo do servizo mediante a instalación dun segundo colector para repartir o fluxo das augas residuais e reducir así o risco de atascos e desbordamentos.
O proxecto que se vai a levar a cabo agora cons fondos provinciais ten un orzamento de 29.680 euros e permitirá continuar mellorando este servizo básico ata completar a totalidade da rúa.

O proxecto de Mellora da mobilidade e accesibilidade en O Vento-Cea é unha actuación que se fai posible grazas ao acordo acadado entre o Concello e a Comunidade de Montes de Cea para colaborar na mellora de determinados camiños da parroquia. A colaboración materializouse na cesión de terreos por parte dos comuneiros e na realización das obras por parte da administración municipal.

A actuación planificada prevé retranquear a marquesiña da parada do autobús que actualmente se atopa enriba da estrada do Pousadoiro (ao pasar o tanatorio), co conseguinte perigo para os usuarios e para a circulación. Os terreos cedidos tamén permitirán abrir a dificultosa saída de vehículos dende o camiño que alí mesmo entronca coa estrada provincial e que, debido a súa estreitez e ao desnivel que presenta, resulta incómoda e perigosa.
A obra ten un orzamento de 27.041 euros.

A solicitude de reinvestimento das baixas en adxudicacións por 56.721 euros xa foi presentada ante a Deputación. Unha vez que o organismo provincial autorice a medida, o Concello sacará a licitación as obras para a súa inmediata execución.