VILAGARCIA DE AROUSA

CULTURA
O auditorio recupera a danza clásica co “Lago dos Cisnes” do Ballet Nacional Ruso
O Auditorio municipal recuperará en outubro a danza clásica da man do Ballet Nacional Ruso de de Serguey Radchenko, primeira compañía privada fundada en 1989 en Rusia, e posiblemente a mellor agrupación que xira por todo o mundo, grazas a un elenco de bailaríns e solistas estable, composto polos mellores de cada momento. A obra escollida nesta ocasión é “O Lago dos Cisnes", do compositor P. I. Tchaikovsky, a obra mais representada en todo o mundo e referencia do ballet clásico para todos os afeccionados. A gala será o domingo 27 de outubro, ás 19:00 horas. As entradas, que xa están á venda en ticketea, van dos 17 euros da zona C aos 19 das zonas A e B.

25.07.2019. Á fronte da formación como director e fundador atópase Serguey Radchenko, lendario bailarín solista do Teatro Bolshoi, quen durante moitos anos foi parella da mítica e primeira bailarina, tamén do Bolshoi, Maya Plisétskaya. Unha compañía estable con 45 bailaríns para unha xira que percorrerá os mellores teatros e auditorios de España, e que tras realizar xiras por todo o mundo segue sendo aclamada e recoñecida como unha das compañías máis prestixiosas, respectadas, valoradas e que mellor representan a esencia do ballet clásico ruso.

O Lago dos Cisnes é unha preciosa historia entre o amor e a maxia, onde se plasma a eterna loita do ben e do mal. O príncipe Sigfrido é o protagonista, que se namora de Odette, unha nova convertida en cisne polo feitizo do malvado Von Rothbart e Odile, o cisne negro e filla do bruxo.

O Ballet Nacional Ruso fudouse en 1989, cando o lendario Sergei Radchenko tentou realizar a súa visión dunha compañía que reunise aos elementos máis clásicos das grandes compañías de Ballet Kirov e Bolshoi. Desde os seus inicios, o Ballet Nacional Ruso completou numerosas xiras por Estados Unidos e Europa, con extraordinarias recepcións en Italia, Francia, España, Alemaña e os Países Baixos, ademais de Reino Unido.