VILAGARCIA DE AROUSA

MEDIO AMBIENTE
O vilagarcián Manuel Vidal gaña o Premio Nacional de Fotografía polo Medio Ambiente
O veciño de Vilagarcía, Manuel Vidal Torrado, foi o gañador do I Premio Nacional de Fotografía polo Medio Ambiente “Tu foto por un planeta mejor” convocado por Ferrovial Servicios, grupo no que se integra Cespa, a empresa concesionario do servizo municipal de limpeza. O certame tiña como obxectivo chamar a atención e sensibilizar a poboación sobre o coidado do medio ambiente. Responsables do Concello e do grupo empresarial presidiron onte o acto da entrega do premio consistente nun patinete eléctrico.

11.07.2019.- Á primeira edición deste Premio de Fotografía concorreron 60 fotografías procedentes de diversos puntos de España. O xurado reunido en Madrid valorou as imaxes, elixindo como gañadora a obra de Manuel Vidal Torrado. A fotografía vencedora foi tomada durante una actividade de limpeza da Ría de Arousa levada a cabo na zona de A Seca, en Cambados, con motivo da celebración do Día do Medio Ambiente. Ademais de espertar conciencias, o xurado valorou que a imaxe representara a implicación da mocidade e a súa concienciación en materia de coidado e conservación do medio natural, así como que reflectise o esforzo físico realizado para mellorar un entorno natural desenterrando e sacando do fango da ría un vello neumático.

Á entrega do premio asistiron o concelleiro de Medio Ambiente, Diego García, o edil de Limpeza, Lino Mouriño, o xerente de Ferrovial para Galicia Sur, Jorge Pérez, a responsable de Comunicación de Ferrovial Servicios en Madrid, Pilar López e o encargado de Cespa-Ferrovial en Vilagarcía, José Manuel García.

Os representantes de Ferrovial entregaron ao gañador o premio del concurso, consistente nun patinete eléctrico e insistiron na importancia dos pequenos xestos que cada persoa pode facer a diario para mellorar e conservar o medio ambiente. Tamén reafirmaron o compromiso do grupo a continuar desenvolvendo iniciativas que contribúan á concienciación dos cidadáns nesta materia.