VILAGARCIA DE AROUSA

CULTURA
O Festival Internacional de Fotografía iNstantes chega a Vilagarcía con mostras e actividades en Rubiáns e no Salón García
Vilagarcía de Arousa converterase do 15 ao 22 de xuño na primeira cidade de España en acoller o Festival Internacional de Fotografía “iNstantes”. O certame creado en Portugal e que este ano celebra a súa sexta edición contará cunha delegación na nosa cidade para organizar mostras e actividades que terán como puntos neurálxicos o Salón García, no centro da cidade, e Rubiáns, concretamente o Centro Socio Cultural da parroquia e a finca Fontán. Trinta fotógrafos, entre eles cinco arousáns, aportan obras ás exposicións, que tamén contarán con fotografías realizadas por autores doutras localidades de Galicia e de España, así como de países como Portugal, Brasil, Arxentina, Francia e Honduras.

11.06.2019.- O programa de iNstantes en Vilagarcía inclúe entre as actividades a desenvolver no Salón García proxeccións fotográficas, charlas debate sobre diversos temas, como a atención á diversidade e través da linguaxe da imaxe e a proxección dunha curtametraxe do cineasta vilagarcián David Blanco.

A coordinadora da sección do iNstantes en Vilagarcía é Teresa Díaz Charlín que, á hora de programar as actividades valorou principalmente a calidade das obras e potenciar a visualización e o recoñecemento de autoras galegas emerxentes, ou fotógrafas vencelladas a Galicia. Na finca Fontán (Rubiáns) poderanse ver 13 exposicións individuais, unha instalación e 1 exposición conxunta dun colectivo de Murcia. Neste mesmo marco tamén se celebrarán proxeccións, encontros e charlas debate. Por último, no Centro Socio Cultural de Rubiáns instalarase unha exposición individual.

O certame
O festival que naceu na localidade lusa de Avintes (Vilanova de Gaia) está dirixido polo fotógrafo Pereira Lopes. Neste tempo foi medrando pouco a pouco e enriquecéndose con propostas diversas dentro do mundo da fotografía artística, conceptual e de autor. Ademais, durante as cinco edicións celebradas ata o de agora, o festival foi expandíndose, tratando o seu director de que cada ano teña un foco de difusión fora do Portugal continental. De feito, no que leva de percorrido, xa tivo unha delegación en Bogotá (Colombia) e en 2018 estivo representando en Constanza (Romanía) e na Ribeira Grande (Illas Azores).

+ info en: http://www.instantesffa.com/programacao-2 /
http://www.instantesffa.com /