VILAGARCIA DE AROUSA

CONCELLO
As praias do Campanario e Preguntoiro repiten bandeira azul e consolidan o seu selo de calidade
Vilagarcía volverá a ver ondear este ano a bandeira azul nas praias do Preguntoiro (Vilaxoán) e O Campanario (Bamio). O goberno local acolleu con gran satisfacción a noticia da renovación dos dous galardóns que se coñeceu esta mañá coa publicación por parte da Adeac da lista de enseñas que a organización concede en función a criterios de calidade das augas, medioambientais e de servizos dos areais.Para o executivo esta nova, avala o intenso traballo realizado nos últimos anos para o mantemento dos areais e anima a continuar impulsando mellora como a que se está xestionando ante Costas para solucionar o problema dos arrastres de area.

07.05.2019.- O alcalde, Alberto Varela, puxo de manifesto a súa alegría pola confirmación dunha nova que, non por esperada, resulta menos satisfactoria. O rexedor lembrou que as bandeiras azuis son un símbolo e un estándar mundial de ecocalidade turística, recoñecido e apoiado polos organismos das Nacións Unidas, polo que contribúe a posicionar a Vilagarcía no mapa das mellores praias. Tamén destacou que Asociación de Educación Ambiental e do Consumidor (Adeac) é o organismo autónomo e independente que se encarga a nivel mundial de comprobar se os areais e instalacións cumpren cos requisitos de calidade e servizos que se precisan para obter o galardón e de concedelos anualmente, “algo para o que o Concello traballa durante todo o ano e cuxas labores se intensifican durante a temporada de baño”.

De feito, a renovación das dúas enseñas refrenda o traballo que está realizando o Concello a nivel medioambiental e de mantemento para seguir elevando a calidade das augas mediante actuacións no saneamento e coa mellora dos areais e as súas contornas, así como na mellora da accesibilidade, e ampliación de servizos como a dotación de cadeiras flotantes e muletas para que as persoas con problemas de mobilidade tamén poidan gozar das praias de Vilagarcía.

Estes esforzos non se limitan aos areais de Bamio e Vilaxoán, se non que se estenden tamén aos da Concha-Compostela que, pese a non estar obrigados por no dispor de bandeira azul, contan igualmente con todos os servizos que este galardón precisa, como vixilancia e socorrismo, accesibilidade ou limpeza diaria. Ademais, nos últimos dous anos elevouse a cualificación de calidade das augas dos areais de Canelas e da Covacha ata o nivel de “excelente”.

O goberno felicita a todos os vilagarciáns pola obtención duns galardóns que contribúen a potenciar a marca Vilagarcía dentro e fora de Galicia e que confía en que repercutan positivamente na promoción turística e na dinamización da economía local.