DEPORTE
A Fundación de Deportes formará a 130 xóvenes nas escolas náuticas de remo, vela, piragüismo e salvamento acuático A Fundación Municipal de Deportes volverá a poñer en marcha este verán as catro escolas náuticas para as especialidades de remo, vela, piragüismo e salvamento acuático. As actividades están dirixidas a rapaces e rapazas de Vilagarcía, de 8 a 16 anos, que saiban nadar e o custe de participación é de 12 euros para cada actividade, prevéndose as bonificacións habituais. En total ofértanse 130 prazas con 40 para a escola de vela e 30 para cada unha das demais. A primeira actividade en celebrarse, do 3 de maio ao 30 de xuño, será a de vela, cuxo prazo de inscrición se abre o luns, 8 de abril.
05.04.2019.- O Consello Reitor da Fundación de Deportes aprobou na reunión celebrada onte a oferta das escolas náuticas municipais de 2019 a celebrar a partir de maio e durante os meses de verán. Como se dixo anteriormente, a especialidade de vela desenvolverase do 3 de maio ao 30 de xuño, a escola de salvamento acuático, do 4 de xuño ao 4 de agosto, mentres que as de piragüismo e remo celebraranse entre o 1 de xullo e o 31 de agosto. Nos catro casos, impartiranse dúas horas semanais, as cales poderían recibirse nunha única sesión.
O período de inscrición de alumnos na escola de Vela vai do 8 ao 26 de abril; na de salvamento acuático, do 29 de abril ao 24 de maio; e para as escolas de piragüismo e remo establécese un único período de inscrición que vai do 2 de maio ao 21 de xuño. As solicitudes deben presentarse na oficina da Fundación de Deportes do Concello, sitas no pavillón de Fexdega. A adxudicación das prazas realizarase por orde de inscrición.