CONCELLO
Comezan a funcionar os autobuses nocturnos ata o final do verán Dende esta semana os veciños e visitantes xa se poden beneficiarse da extensión do servizo de buses urbanos na liña Vilaxoán-Vilagarcía-Carril, é dicir, o percorrido da liña de costa que une as tres vilas, grazas ao convenio establecido entre o Concello e a concesionaria Benito Abalo (que absorbeu a Autobuses Pereira). Deste xeito, de luns a venres, o horario de noite funcionará de 22:40 a 01:10 da madrugada.
13.07.2018. Pero ademais, e como xa se fixera o ano pasado, o servizo será ampliado ata as 03:00 horas cando coincida con festas ou eventos sinalados. O festival internacional de blues, Vilablues, será quen estree o servizo, hoxe e mañá, sábado 14. A seguinte data serán as festas do Apóstol no Carril (noite do 24 –martes- para o 25). Logo virán o Carme (21 e 22), San Roque de Vilagarcía (10, 11,e 12), o Festival de Revenidas (17, 18 e 19) e a Noite Meiga (25). En setembro haberá un só día que o servizo chegue ás 3 da mañá, será o día 1 –sábado-, coincidindo co Ameixa Rock.
Con esta medida, o goberno de Alberto Varela pretende, por unha banda, mellorar a seguridade dos veciños e visitante; por outro, alixeirar a circulación de vehículos nunhas datas na que a cidade recibe milleiros de persoas; e, por último, e non menos importante, promover o uso dos medios de transporte públicos. Cabe lembrar, neste sentido, que en todos eses días funcionará tamén o servizo de préstamo de bicicletas Vaibike!