MULLER
Igualdade desenvolve esta tarde a primeira das xornadas “Xénero e diversidade afectivo-sexual nas aulas” As xornadas formativas sobre "Xénero e diversidade afectivo-sexual nas aulas" organizadas pola Área de Igualdade do Concello de Vilagarcía póñense a andar mañá, xoves 24 de maio, coa celebración da primeira das dúas sesións programadas. Un cento de docentes, educadores e membros das ANPAS asistirán ás actividades que terán lugar na Sala de Conferencias do Auditorio a partir das 16.45 horas e nas que psicólogos especializados na materia, educadores sociais, profesores de distintos centros educativos de Galicia exporán a súa experiencia na materia
23.05.2018.- A educación en clave de xénero e a diversidade afectivo sexual no ámbito dos centros ensino é a temática das xornadas formativas organizadas pola Área de Igualdade co obxectivo de poñer a disposición de profesores, educadores e pais as ferramentas necesarias para poder contribuír a unha educación en clave de igualdade, ademais de expoñerlle experiencias que xa se están a desenvolver noutros lugares.
O programa de hoxe abrirase ás 16:30 horas cun acto inaugural que dará paso á primeira das conferencias, a que ofrecerá a psicóloga, investigadora e asesora de xénero en igualdade, Cristina Bajo Enríquez, para falar sobre "Estratexias prácticas de Igualdade nos Centros educativos".
Ás 18:45 comezará a mesa de boas prácticas na que tomarán parte a coordinadora da biblioteca do IES Castro Alobre, Lupe Vilar Bernárdez, que falará sobre a experiencia da "Biblioteca escolar como promotora da coeducación". Baixo o título de "Camiñando na Igualdade" exporán as súas experiencias a profesora de educación infantil do CEIP As Fontiñas, Teresa Mallo Mira, a representante da Comisión de Coeducación e Igualdade da ANPA Fontenla, Natalia Poncela; e Cristina Bajo que, exporá as súas experiencias de traballo co profesorado e ANPAS.
Como último acto do día, ás 20:40 horas procederase a inauguración da exposicións “A Igualdade de xénero nas Aulas. 12 anos do Premio ás boas prácticas na Escola”. A mostra fai un repaso polos 12 anos do premio convocado pola Área de Igualdade e o CIM do Concello de Vilagarcía. A segunda e última xornada celebrarase o vindeiro xoves.