URBANISMO
A firma Alfonso Botana S.L. faise co contrato para continuar cos traballos de revisión PXOM O Plan Xeral de Ordenación Municipal de Vilagarcía deberá chegar ao trámite da aprobación inicial no prazo máximo de 12 meses a contar dende que se concrete a firma do novo contrato que a Xunta de Goberno Local acordou hoxe adxudicar á firma Alfonso Botana S.L. por importe de 68.909 euros. Con este trámite resólvese o problema xerado tras a renuncia da anterior adxudicataria, Eptisa, e desbloquéase o proceso para poder continuar coa revisión do planeamento dende o punto no que ésta o deixara. Porén, a primeira labor do equipo de Botana será recompilar e remitir á Xunta a información complementaria que tiña requirido para poder continuar a tramitación na administración autonómica.
09.04.2018.- O Concello licitou o contrato polo procedemento de negociado sen publicidade e invitou a tres empresas a participar no concurso para continuar coa redacción do PXOM. Concluídos os prazos legais, a firma de Botana foi a única que formalizou oferta, polo que, unha vez avaliada polos servizos técnicos e xurídicos que comprobaron que reunía os requisitos, esta mañá procedeuse á adxudicación do contrato. A oferta de Botana rebaixou en 3.691 euros o prezo de licitación que era de 72.600 euros.
Despois da demora que supuxo a renuncia de Eptisa tras ser adquirida por unha internacional chinesa que se desprendeu da sección de planeamento, a pretensión do goberno local é que os traballos que agora se retoman se desenvolven coa maior premura. O prazo máximo dado para completar os trámites ata que o documento estea listo para a súa aprobación inicial é de 12 meses, aínda que se pide á adxudicataria a máxima celeridade posible para tratar de acurtalos na medida do posible.
VENTAXA DO COÑECEMENTO PREVIO
O aspecto positivo neste sentido é que Botana formaba parte do equipo de Eptisa que estaba a levar a cabo a revisión do PXOM de Vilagarcía dende o ano 2008, polo que o coñecemento previo dos traballos realizados neses anos, así como do estado da tramitación permitirá avanzar con maior velocidade da que o faría alguén que tivera que poñerse ao tanto da situación e comezar dende cero. Ademais, Botana é un bo coñecedor da realidade municipal de Vilagarcía ao ter traballado con tres Corporacións e gobernos diferentes ao longo deste tempo.
UN PASO POSITIVO PARA VILAGARCÍA
Para o goberno local, o trámite que se ven de completar hoxe coa adxudicación deste contrato supón un paso moi importante para Vilagarcía, posto que despexa o futuro en canto á continuación da revisión do Plan, que tras o revés da renuncia de Eptisa, xa poderá continuar avanzando a un ritmo normal. O executivo lembra que contar cun ordenamento urbanístico adaptado ás necesidades e características da Vilagarcía do século XXI é esencial para o progreso e o desenvolvemento ordenado e sostible do noso territorio e que, continuar demorando o proceso resultaría moi lesivo para o interese xeral dos vilagarciáns.
O contrato ten como obxectivo completar a fase de aprobación inicial do documento, polo que nel inclúense a realización de todos os traballos e informes necesarios para acadar esta primeira meta. A continuación abriríase o prazo de exposición ao público e habería que sacar a contratación os traballos da última fase de tramitación do PXOM que incluiría a información e resolución de alegacións e toda a tramitación posterior tendente á aprobación definitiva e posterior entrada en vigor do Plan.