FORMACIÓN
Emprego amplía o programa de cursos gratuítos de inclusión e capacitación dixital A Concellería de Promoción Económica e Emprego presentou a programación de cursos de Inclusión e capacitación Dixitais a desenvolver este ano. Trátase de 22 accións formativas repartidas en cinco bloques temáticos que, comezando dende o nivel de iniciación en temas informáticos, van aumentando en grao de complexidade co obxecto de facilitar unha formación completa ao alumnado. Os cursos son para persoas maiores de 18 anos e a participación é gratuíta.
16.02.2018.- O concelleiro de Formación e Emprego, Juan Antonio Pérez Callón, indicou a obxectivo deste programa é facilitar o aceso, coñecemento e manexo das novas tecnoloxías a todas as persoas ademais de facilitarlles o acceso ao mercado laboral mediante a mellora de empregabilidade que supón contar cos coñecementos sobre informática e TICs que demanda calquera empresa hoxe en día. Precisamente, para que o proceso sexa máis doado, tamén haberá cursos sobre o aproveitamento das novas tecnoloxías á hora de buscar traballo, ou manexo dos medios dixitais e redes especializadas en ofertas e demanda de emprego.
O primeiro bloque será o de inclusión dixital en el inclúense os cursos dirixidos a persoas con pouco ou ningún coñecemento. Son os de Iniciación á informática e internet para adultos, Correo electrónico: webmail e Seguridade na Rede.
Cunha orientación máis profesional deseñouse o segundo bloque temático sobre Ofimática e Software Libre composto de oito cursos divididos en dous apartados. No de nivel básico impartiranse formación sobre Procesador de textos I, Folla de Cálculo I, Elaboración de presentacións I, e base de datos I. No apartado de nivel avanzado tocaranse as mesmas temáticas pero máis en profundidade e avanzando no seu desenvolvemento.
O terceiro bloque temático do programa dedícase á Administración Electrónica. E-Administración en el impartirase un curso sobre O uso do DNI electrónico e o certificado Dixital e outro de Trámites Electrónicos e administración electrónica, con especial atención á sede electrónica do Concello de Vilagarcía.
Capacitación avanzada en ferramentas TIC é o título do cuarto bloque temático no que se inclúen cursos de deseño de páxinas webs con wordpress, Cloud Computing, Programación para dispositivos móbiles, Google APPS, Retoque Fotográfico e Deseño Gráfico.
Por último, e dada a finalidade última deste programa formativo, o quinto bloque temático será o relativo á Orientación ao Emprego. Nel impartiranse cursos sobre redes Sociais e procura de Emprego, APPS Móbiles para a busca activa de emprego e sobre Elaboración de Currículos.
As accións formativas desenvolveranse na aula CEMIT do Centro de Formación Permanente de Matosinhos entre os meses de marzo a novembro e serán impartidas por persoal especializado da Consulta Kaeme. Ofértanse 20 prazas en cada curso, aínda que de haber moita demanda, repetiríase a acción formativa. As inscricións poden realizarse xa no centro de Matosinhos en horario de 9 a 14 horas.
Boa acollida da primeira edición
A Concellería de Formación e Emprego creou o ano pasado este programa formativo gratuíto de inclusión e capacitación dixital. A primeira edición contou cunha excelente acollida xa que un total de 413 alumnos e alumnas participaron nos 25 cursos que se impartiron e que supuxeron un total de 600 horas lectivas. Para a organización deste programa formativo, o Concello dispón dunha subvención autonómica de 15.000 euros para a realización de cursos de capacitación dixital no eido da administración local, toda vez que a aula CEMIT de Vilagarcia foi declara Aula referencia da Amtega.